सडकमा रहेको विद्युतको पोल नहटाउँदा निर्माण कार्य अलपत्र पर्ने डर

स्थानीय अनुप सुवेदीले समस्या समाधानका लागि सडक,विद्युत् प्राधिकरणदेखि मेयरसम्मलाई आग्रह गर्दा पनि कसैले नसुनेको गुनासो गर्नुभयो। उहाले भन्नुभयो,”दुर्घटना भयो भने कसले जवाफ दिने?”

वडाध्यक्ष रेशम बहादुर कार्कीका अनुसार वडा नं. ४ मा मात्रै ३०–३५ वटा पोल हटाउनुपर्ने अवस्था छ। “विद्युत् प्राधिकरणले पैसा माग्छ, ठेकेदार भन्छ स्टिमेटमा छैन। यस्तो दोधारका कारण काम अगाडि बढ्न सकेको छैन,” उहांले भन्नुभयो,”सवैलाई भन्दा भन्दै थाकिसकियो।”

नगरपालिकाले पनि विद्युत् प्राधिकरणलाई पटक–पटक पोल सार्न आग्रह गरेको तर काम नभएर समस्या आएको स्पष्ट पारेको छ।

नेपाल विद्युत् प्राधिकरण प्युठान वितरण केन्द्रका प्रमुख महेन्द्रकुमार दासले भन्नुभयो, “पोल हटाउन हामीलाई प्रदेश डिभिजन बुटवलको स्वीकृति चाहिन्छ। रिचार्जेबल शीर्षकमा रकम पनि कसैले जम्मा गरेन, हामी आफैंले हटाउन सक्दैनौं।”

सडक डिभिजन प्युठानका प्रमुख सीनियर डीभिज्नल ईन्जिनियर विष्णुदास लामाले भन्नुभयो, “विद्युत् प्राधिकरणले तार हटाइदिए सडक कालोपत्रे तुरुन्त सुरु हुन्छ। हामी तयार छौं।”

तर, दुबै निकायले जिम्मेवारी लिन आलटाल गरेपछि आयोजना नै अलपत्र पर्न थालेको छ। स्थानीयले समयमै पोल नहटाइए दुर्घटना र ढिलाइका लागि प्रत्यक्ष दोषी निकायलाई मान्ने चेतावनी दिएका छन ।